Link açıqlığı

Kyiv Gaaga mahkemesinde Rusiyege qarşı açtırğan davada Meclisniñ faaliyetini ğayrıdan başlatmağa talap ete


Kyivde Mecliske qoltutuv aktsiyası, arhiv fotoresimi

Ukraina Gaagadaki Birleşken Milletler teşkilâtınıñ Halqara mahkemesinde Rusiyege qarşı açtırğan davada Qırımtatar Milliy Meclisiniñ faaliyetini ğayrıdan başlatmağa talap ete, dep bildire yanvar 17-de mahkemeniñ matbuat hızmeti.

«Rusiye qırımtatar halqına qarşı siyasiy ve medeniy taqip areketlerini toqtatmaq, şu cümleden Qırımtatar Milliy Meclisiniñ faaliyetini yasaq etken buyruqnı lâğu etmek, ve bu iş baqılğan müddet devamında bu ve diger tedbirlerni toqtatmaq kerek», – dep aytıla Ukrainanıñ Rusiyege qarşı açtırğan dava boyunca matbuat beyanatında.

Keçken sene 2016 senesi aprel ayında Rusiye kontrol etken Qırım Yuqarı mahkemesi işğal altındaki yarımadada Qırımtatar Milliy Meclisiniñ faaliyetini yasaq etti. Dünya toplulığı Rusiye akimiyetiniñ areketlerine narazılıq bildirdi. Meclis imayesi Rusiye Yuqarı mahkemesine şikâyet etti, amma şikâyet arizası red etilip, Meclis faaliyeti yasaq etildi.

Ukraina İçki işler nazirligi işğal etilgen Qırımda Ukraina vatandaşlarınıñ taqip etilmesinden qasevetlengenini bildirip, basqı yapmamağa çağırdı.

Yanvar 16-da Ukraina Birleşken Milletler teşkilâtında eñ yüksek mahkeme organı olğan Halqara mahkemege muracaat etip, Rusiye terrorizmniñ maliye etilmesi ve millet ayırımı ile küreşke dair halqara konventsiyalarnı boza, dep dava açtırdı.

XS
SM
MD
LG