Qırımda «Hizb ut-Tahrir» davasınıñ mabusı Enver Bekirovnı SİZOda taqiqatçı ziyaret etip, Rusiye Federatsiyası Ceza kodeksiniñ 278-inci maddesi «Akimiyetni küçnen zapt etüv ya da küçnen tutuv» qoşma qabaatına dair kâğıt ketirdi. Bunı «Qırım birdemligi» birleşmesiniñ faali Anna Bogaçeva Facebook saifesinde bildirdi.
«Qırım musulmanlarını Rusiyede akimiyetni küçnen aluv ile qabaatlamağa başladılar. Cuma künü Enver Bekirovnı SİZOda taqiqatçı ziyaret etip, Rusiye Federatsiyası Ceza kodeksiniñ 278-inci maddesi «Akimiyetni küçnen zapt etüv ya da küçnen tutuv» qoşma qabaatına dair kâğıt ketirdi. Advokatnıñ aytqanına köre, bu qabaat Rusiye Federatsiyası Ceza kodeksiniñ 30-ıncı maddesi «Cinayet azırlaması ve cinayet teşebbüsi» maddesi üzerinden ola bile», – dep yazdı Bogaçeva.
Yanvar 12-de Qırım advokatı Emil Kürbedinov «Hizb ut-Tahrir davasınıñ» mabuslarını Rusiyede akimiyetni küçnen zapt etüv ile qabaatlay bileler, dep tenbiyelegen edi.
Rusiye Federatsiyası Ceza kodeksiniñ 278-inci maddesi 12 yıldan 20 yılğa qadar apis cezasınıñ berilmesini belgilemektedir.
«Hizb ut-Tahrir» davasınıñ Yaltalı iştirakçileri yarım yıldan ziyade apiste yata. Birinci dört kişi 2016 senesi fevral 11-de yaqalanğan edi. Olarnıñ arasında İnsan aqları bağ gruppasınıñ azası Emir-Üsein Kuku da bar. Ondan ğayrı qurucılıqnen oğraşqan Aluşta sakini Müslim Aliyev ve Qızıltaş köyüniñ sakini Enver Bekirov, ve Yaltalı çeçek satıcısı Vadim Siruk da yaqalanğan edi.
Uquq qorçalayıcılar apiske alınğan Yalta sakinlerini siyasiy mabus olaraq tanıy.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
