Advokat Nikolay Polozovnı Qırımtatar Milliy Meclisiniñ reis muavini İlmi Ümerovnıñ davası boyundca şaat olaraq sorğuğa çekmek içün Federal havfsızlıq hızmetine (FSB) zorlap ketirecek olalar. Bunı Polozov video izaatında ayttı.
Videonı Qırımtatar Milliy Qurultayı Merkeziy saylav komissiyasınıñ reisi Zair Smedlâyev Facebook saifesinde derc etti.
Advokat qayd ete ki, yanvar 16-da Ahtem Çiygoz davası boyunca mahkeme oturışınıñ teneffüsinde mahkemege FSB taqiqatçısı Skripka ve FSB hadimi Şevçenko keldiler.
«Olar İlmi Ümerovnıñ davası boyunca şaat olaraq sorğuğa çekilmeme dair celpnameni berecek oldılar. Men onı kene almadım, taqiqatçınıñ areketleri qanunsız ola dep, qararımnı añlattım. Uquqiy yardım köstergende alğan malümatlar boyunca advokatnı sorğuğa çekmek qanun tarafından yasaq etiledir. Taqiqatçı Skripka bunıñ neticesinde meni FSBge zorlap ketireceklerini, protokol tizilecegini ve «İlmi Ümerovnıñ davası» boyunca şaat olaraq sorğuğa çekilecegimni ayttı», – dep ayttı Polozov.
Advokatnıñ bildirgenine köre, keçken yılnıñ soñunda o taqiqatçı Skripkağa Polozovnı sorğuğa çekmege izin bergen Kiyev rayon mahkemesiniñ qararından şikâyet arizasını yazdı.
«Bugün ögrendim ki, bu şikâyet daa kelmegen eken, qarar işke tüşürilmedi, demek ki, taqiqatçı Skripkanıñ areketleri bütünley qanunsız ola. Bu areketleri meni Qırımdan quvacaq ola, Rusiye uquq qoruyıcı sistemasınıñ repressiyalarına oğrağan Ukraina vatandaşlarına yardım etmemi istemeyler», – dep ayttı Polozov.
Dekabr 20-de Qırımda advokat Nikolay Polozovğa qarşı cinaiy iş ğayrıdan açıldı.
Bundan evel Rusiyeniñ Qırımdaki taqiqat komiteti Qırımda qırımtatarlarğa qarşı açılğan bir sıra davada imayeci olğan Rusiye advokatı Nikolay Polozovğa qarşı cinaiy iş açmağan ruhset bermegen edi.
