Kreml kontrol etken Qırım Yuqarı mahkemesinde 2014 senesi fevral 26 künü Aqmescitte olıp keçken miting fotoresimleri tedqiq etilip, Qırımtatar Milliy Meclisiniñ reis muavini Ahtem Çiygoz anda qayd etilmedi. Bunı Çiygoznıñ advokatı Nikolay Polozov video izaatında ayttı.
Videonı Qırımtatar Milliy Qurultayı Merkeziy saylav komissiyasınıñ reisi Zair Smedlâyev Facebook saifesinde derc etti.
Polozovnıñ aytqanına köre, 2017 senesi yanvar 16 künü oturışınıñ birinci qısmında mahkeme prokuror bergen delillerni tedqiq etti: 2014 senesi fevral 26 mitinginiñ fotoresimlerini.
«Saat 14:24-ke qadar fotoresimler tedqiq etildi. Bu vaqıtqa qadar fotoresimlerde bir de bir kütleviy çatışmay qayd etilmey. Ahtem Çiygoz da yokh, zarar körgen şaatlarnıñ malümatı kerçek degil. Olar Çiygoz miting iştirakçilerini idare etip, açılğan koridorda yüre edi, dep aytqan ediler», – dedi advokat.
Yanvar 16-da Polozov «Çiygoz davasınıñ» mahkemesinde «zarar körgenniñ» malümatları onsız seslendirildi, dep bildirgen edi.
Advokatnıñ aytqanına köre, nevbetteki mahkeme oturışı yanvar 17-ne belgilendi.
Ahtem Çiygoz 2015 senesi yanvar ayında 2014 senesi fevral 26-da Qırım Yuqarı Radasınıñ binası ögünde keçirilgen Ukraina topraq bütünligine qoltutuv mitinginde iştirak etkeni içün yaqalanğan edi. O vaqıt Rusiye tarafını tutqan, bu cümleden «Rus Birligi» firqası, miting iştirakçilerine qarşı çıqtı. İşğal olunğan Qırımnıñ Rusiye akimiyeti onı kütleviy çatışmalarnıñ teşkil etmesi ile qabaatlay.
Rusiye mahkemesi «Çiygoznıñ işini» «fevlral 26 işi» çerçivesinde, iyül 20-de mahkeme qapalı toplaşuvda «fevral 26 işini» ekige bölgen soñ oldı: ayrı – Ahtem Çiygoz boyunca, ve ayrı – cinaiy iş boyunca qabaatlanğan Ali Asanov ve Mustafa Degermenci boyunca.
Qırım «mahkemesi» Çiygoznı aprel 8-ne qadar apiste qaldırmağa qarar alğan edi.
