Kreml nezaretindeki Qırımnıñ Yuqarı mahkemesi, Qırımtatar Milliy Meclis reisiniñ muavini Ahtem Çiygoznıñ işi boyunca nevbetteki toplaşuvında, qurbannıñ özü olmadan, onıñ ifadelerini oqudı. Bunı yanvar 16 künü Çiygoznıñ advokatı Nikolay Polozov Twitterde yazdı.
«Qurbanlardan biri Şlâginniñ bulunğan yeri belli olmağan soñ, mahkeme özü onıñ ifadelerini oqumağa qarar aldı», – dep yazdı Polozov.
Advokatnıñ sözlerine köre, «şaatlardan biri olğan Arpatlını da mahkeme tapıp olamadı. Lâkin onıñ ifadeleri şimdilik oqulmaycaq, çünki imaye onı tapa bildi».
Yanvar 16 künü, saba Qırımda «Çiygoznıñ işi» boyunca mahkeme toplaşuvları devam ettirilgeni bildirildi.
Ahtem Çiygoz 2015 senesi yanvar ayında 2014 senesi fevral 26-da Qırım Yuqarı Radasınıñ binası ögünde keçirilgen Ukraina topraq bütünligine qoltutuv mitinginde iştirak etkeni içün yaqalanğan edi. O vaqıt Rusiye tarafını tutqan, bu cümleden «Rus Birligi» firqası, miting iştirakçilerine qarşı çıqtı. İşğal olunğan Qırımnıñ Rusiye akimiyeti onı kütleviy çatışmalarnıñ teşkil etmesi ile qabaatlay.
Rusiye mahkemesi «Çiygoznıñ işini» «fevlral 26 işi» çerçivesinde, iyül 20-de mahkeme qapalı toplaşuvda «fevral 26 işini» ekige bölgen soñ oldı: ayrı – Ahtem Çiygoz boyunca, ve ayrı – cinaiy iş boyunca qabaatlanğan Ali Asanov ve Mustafa Degermenci boyunca.
Qırım «mahkemesi» Çiygoznı aprel 8-ne qadar apiste qaldırmağa qarar alğan edi.
