2017 senesi devamında Rusiyeniñ 13 regionında Qırımnıñ şifahane-kurort ve turistik imkânları aqqında tarif etecekler. Bunı Kreml nezaretindeki Qırımnıñ Kurort ve turizm nazirliginiñ matbuat hızmeti bildire.
Müessisede qayd eteler ki, Qırımnıñ turistik tekliflerini ögge çekmek içün taqdim merasimleri Moskva, Petersburg, Yekaterinburg, Rostov-na-Donu, Novosibirsk, Nijniy Novgorod, Qazan, Murmansk, Krasnodar, Hantı-Mansiysk şeerlerinde, Moskova ve Leningrad bölgelerinde ve Stavropol vilâyetinde ötkerilecek.
«Bu regionlar tesadufen saylanmağanlar. Olarnı saylağanda bizler Rusiye subyektleriniñ cazibesine esaslandıq, ve, Rusiyeniñ angi regionlarından bizge daa çoq turist kelgenini köstergen, 2016 senesi keçirilgen içtimaiy soravnıñ neticelerini esapqa aldıq», – dep qayd etti Qırımnıñ rusiyeli kurort ve turizm naziri Sergey Strelbitskiy.
Bundan evel, 2015 senesine nisbetten, bu sene yañı yıl tatillerinde Qırımğa kelgen insanlarnıñ sayısı eki qat ziyadece olğanı bildirilgen edi.
