Qırımdaki «Hizb ut-Tahrir davalarınıñ» Avropa insan aqları mahkemesinde müsbet kelecegi bardır. Ukraina Helsinki birliginiñ insan aqları strategik işleri merkezi Avropa mahkemesine 10 Qırım işini berdi, olar «birinci filtrden» keçti – nomeraları berildi, eñ yaqın vaqıtta işlerni bütünley baqmağa başlaycaqlar. Bunı Ukraina Helsinki birliginiñ insan aqları strategik işleri merkeziniñ uquqçısı Anastasiya Martınovskaya yanvar 13-de Kyivdeki matbuat konferentsiyasında ayttı.
«Şunı aytmaq ister edim, eki yıldan berli Qırım işlerini baqamız ve Avropa insan aqları mahkemesine teslim etmege azırlanamız, bu müddet içinde delili olğan bir qarar bile körmedik. Bütün işler siyasiy sebeplerden açılıp, adaletniñ esas talaplarına bile riayet etmey», – dep qoştı uquqçı.
Onıñ qayd etkenine köre, Merkez mütehassısları «işler daa sert olğanını» ayta, Yarovayanıñ terrorizm ile küreş qanunları işke tüşürilgen soñ ise ekstremizm ve terrorizm davalarınıñ cezaları eki qat arta bile.
Qırım işğalinden soñ Rusiye mahsus hızmetleri yarımada zaptına qarşı çıqqan qırımtatarlar ve Ukrainağa qoltutqan faallerni taqip etmege başladı. Onlarnen insan, hususan Bağçasaray, Aqyar, Yalta ve Aqmescitten qırımtatarlar apiske alındı. 19 kişi Hizb ut-Tahrir islâm teşkilâtınd iştirak etmesi ile qabaatlanıp apiske alındı. Bundan ğayrı, Qırımda insanlar ğayıp olmağa devam ete. Bazıları ölü tapılğan, qalğanları aqqında bir haber yoq.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
