Link açıqlığı

«Hizb ut-Tahrir davasınıñ» mabusı Sirukqa qarşı yañı qabaat azırladılar – Kürbedinov


Emil Kürbedinov

Rusiye Federal havfsızlıq hızmeti (FSB) «Hizb ut-Tahrir davasınıñ» mabusı Vadim Sirukqa qarşı akimiyetni zornen zapt etüv qabaatını azırladı. Bunı Qırım advokatı Emil Kürbedinov İnsan aqları malümat merkezine izaat berip ayttı.

«Bu resmiy bir malümattır. Onı Rusiye FSB taqiqatçısı Sergey Mahnev aydınlattı. O, telefon vastasınen salı künü (yanvar 17-de – QA) Vadim Siruk akimiyetni zornen zapt etüv ya da akimiyetni zornen tutuv ile qabaatlanacağını ayttı. İşdeşlerim bildirdi ki, «Yaltalı dört» iştirakçilerine de aynı qabaatları aydınlatılacaqtır», – dep ayttı Kürbedinov.

Advokatnıñ fikirince, bunıñ kibi qabaatlar «Hizb ut-Tahrir davasınıñ» bütün mabuslarına qarşı kösterile bile. Advokat emin ki, Qırım musulmanlarına qarşı açılğan bir qaç cinaiy iş aynı taqiqatqa birleştirilecektir.

«Olar qabaatnı aydınlatıp, işlerni birleştirmege qarar alacaqlar. Bunı bir afta içinde yaparlar. «Hizb ut-Tahrirde» iştirak etmesi ve «Akimiyetni zornen zapt etüv» maddeleri boyunca bir cinaiy iş olacaqtır», – dedi Emil Kürbedinov.

Onıñ zanınca, bu qabaatlar mahkemede işleri şimdilik baqılmağan qırımlılarğa qarşı da kösterile bile. Advokat yañı ceza maddesi aman-aman bir yıl devam etken Vadim Siruk ve «Yaltalı dört» işiniñ taqiqatını uzatmaq içün qoşula, dep tüşüne.

Qırım işğalinden soñ Rusiye mahsus hızmetleri yarımada zaptına qarşı çıqqan qırımtatarlar ve Ukrainağa qoltutqan faallerni taqip etmege başladı. Onlarnen insan, hususan Bağçasaray, Aqyar, Yalta ve Aqmescitten qırımtatarlar apiske alındı. 19 kişi Hizb ut-Tahrir islâm teşkilâtınd iştirak etmesi ile qabaatlanıp apiske alındı. Bundan ğayrı, Qırımda insanlar ğayıp olmağa devam ete. Bazıları ölü tapılğan, qalğanları aqqında bir haber yoq.

«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.



XS
SM
MD
LG