Link açıqlığı

Kurbedinov: Semenanı mahkemede – rus duşmanı ve Putinni nefret etken biri olaraq tanıtacaqlar


Advokat Emil Kurbedinov

Rusiyeniñ mahsus hızmetleri Qırımda işletken yöñelişlerinden biri – haber vastalarına basqı. Böyle işlerden biri – Nikolay Semenanıñ işi, onı «ruslarnıñ duşmanı ve Putinni nefret etken biri» olaraq tanıtmağa tırışalar. Bunı Kyivte yanvar 13 künü keçirilgen matbuat konferentsiyasında advokat Emil Kurbedinov añlattı.

«Nikolay Semenanıñ işi ve Qırımdaki jurnalistlerde keçirilgen tintüvler –Qırım Muhtar Cumhuriyetinde çalışqan jurnalistler öz faaliyetini toqtatmaq kerek olğanlarını añlasınlar dep yapılğan. Ruslarnıñ duşmanı, Putinniñ duşmanı, eñ negativ şekilde onı köserecekler, çünki o sadece bazı siyasiy vaziyetlerge qıymet kesip öz noqta-i nazarını bildire edi», – dedi Kurbedinov.

Advokat hatırlattı ki, Nikolay Semenanıñ cinaiy işinde malümatnıñ 80% – jurnalistniñ kompyüterinde olğan malümatlarnıñ ekran resimleridir. Kurbedinovnıñ fikirine köre, Semenanıñ qabaatını tasdiqlaycaq iç bir temelli isbatı yoq. Rusiye mahsus hızmetleriniñ ekspertizalarına ise advokat «keskin tenqit» ile davrana.

Baarde Qırımda Qırım.Aqiqat ile işbirliginde şeklengen jurnalistlerniñ evlerinde tintüvler olıp keçti. Radio Svoboda müellifi Nikolay Semenağa qarşı Rusiye Federatsiyasınıñ topraq bütünligini bozmaq çağıruvları şeklenmesi ile cinaiy iş açıldı. Rusiye taqiqatı oña yarımadanı terk etmege yasaq etti.

Nikolay Semenanıñ imayesi, Halqara ve Avropa Jurnalistler Federatsiyası, em de Söz serbestligi boyunca OSCE temsilcisiniñ ofisi, Rusiye Federal telükesizlik hızmetini – jurnalistni, tedaviylenmek içün, Qırımdan yibermege çağırdı, şimdige qadar musbet cevap daa alınmadı.

XS
SM
MD
LG