Rusiyeli advokatlar, ekspert ve uquq qorçalayıcılar, Rusiyede ve ilhaq etilgen Qırımda cinaiy işlerniñ alıp barılmasına dair ğamlı tüşüncelerini paylaşalar. Böylece, Kyivte yanvar 13 künü keçirilgen matbuat konferentsiyasında advokat Emil Kurbedinov, terrorizm ve ekstremizm aqqında maddeler boyunca basqılar daa devam ettirilecegini ayttı.
«Qanunlar yazılğan, Yüksek mahkemelerniñ qararları alındı, ve olar içün para ayırılğanı qadar ve ekstremizmge ve terrorizmge qarşı küreşken bölükler temin etilgeni qadar, bu işler de azırlanılacaqlar. Çünki Sovetlerniñ bu «tayaq sisteması» qaviy tura ve kün-künden Federal telükesizlik hızmeti tarafından küçlene. Olar, paralarnı qayda sarf etkenleri aqqında esabat bermek kerekler, olar özlerine unvanlar qazanmaq kerekler, ve saire. Çoqusı ekspertler dey ki, esas noqlaradan – paralarnıñ çalınması ve unvan ile rütbelerniñ qazanılması qalmaqta», – dedi Kurbedinov.
Ukraina Haber siyaseti naziriniñ birinci muavini Emine Ceppar qayd etti ki, Rusiyeniñ Qırımdaki uquq qoruyıcılarınıñ «yañı mevzusı» peyda oldı, 2016 senesinden başlap «ukrain diversantlarınıñ» işlerini baqalar.
«Bu kibi işke Qırımnı ziyaret etken er angi ukrainli celp etilmek mümkün, er birisini diversant adlandırıp, işğal etilgen Qırımda qapatmaq mümkünler, böylece yañı işler uydurılacaq», – dep tüşüne Ceppar.
Uquq qorçalayıcılarnıñ esaplarına köre, Qırımnı işğal etip, Rusiye 403 halqara añlaşmanı bozdı.
Ukraina Tışqı işler nazirligi yaqalanğan, hususan siyasiy maqsatnen apis etilgen, ukrainlilerniñ aqları bozulğanına qarşı defalarca şikâyet bildire edi. Rusiye taqiqat komiteti, ekstremizm, diversion areketler, casuslıqra qabaatlanğan Ukraina vatandaşlarınıñ qabaatını isbaatlamaq içün yeterli qadar delil bar olğanını tasdiqlay.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ işğal ve ilhâq etilmesini qanunsız areket olaraq tanıdılar. Ğarp memleketleri bir sıra iqtisadiy sanktsiyalarnı kirsetti.
