Qırımda tintüv keçirilgen yerlerni, mahkemelerni ziyaret etken, insan aqlarınıñ vaziyetini nezaret etken, adiselerni haber vastalarında aydınlatqan faal vatandaşlarnıñ toplumı peyda oldı. Bu faallerni memuriy taqiqatlarğa oğratıp başladılar.
Bunı Kyivde yanvar 13 künü matbuat konferentsiyası devamında uquq qorçalayıcı Lilâ Gemeci beyan etti.
«Neler ola: pervasız qalmağan insanlar, vaziyetni aydınlatıp, bunıñ aqibetinde FSB tarafından ögrenile, resimlerge çekile ve soñra olarnen «çalışıp» başlaylar. Qırımda yapılğan qanun bozuvlarınıñ aydınlatılmasına yol bermemek içün, faallerni qorqutalar ve taqip eteler», – dey uquq qprçalayıcı.
O 2016 senesi mayıs 12 künü Bağçasarayda «Salaçıq» qavehanesi yanında yüz bergen vaziyet aqqında hatırlattı. O vaqıt Rusiyeniñ Qırımdaki FSB vekilleri qavehanede tintüv kerdiler, bina yanında vatandaşlar toplaştı. Neticede beş faalni memuriy mesüliyetlikke celp ettiler (10 ve 20 biñ ruble arasında paa cezaları), çünki olar, sanki, tintüv yerinde keçirilgen izinsiz mitingni ötkerdiler.
Gemeci, bu işlerde olğan qanun bozuvlarına işaret etti. Böylece, uquq qoruyıcınıñ sözlerine köre, o yerde rus uquq qoruyıcıları tarafından tertip etilgen memuriy protokollar qanun talaplarına uyğun degiller, işler baqılğanda qabaatlanğanlar özüne imayecilerni saylap olamay ediler, mahkemede imayeniñ bir-sıra şikâyetleri red etildi.
«Eki memuriy qanun bozuvı sebebinden insan cinaiy surette taqip etilmek mümkün, cinaiy cryan ise – Qırımda İldar Dadinniñ taqdirini tekrarlaycaq insanlar toplumı şekillenecegini añlata (rusiyeli muhalifet faali, «kütleviy merasimlerniñ qaidelerini defalarca bozğanı» içün Rusiyete mahküm etilgen yekâne faaliyetçi, 2,5 yalğa apiske oturtıldı – QA)», – dedi Gemeci.
Mayıs 12 künü 2016 senesi Bağçasarayda rusiye silâlı hızmetleri bir sıra musulmannıñ evinde ve yerli qavehanede tintüv keçirdi. Neticede dört Bağçasaray sakini yaqalandı: Enver Mamutov, Remzi Memetov, Zevri Abseitov ve Rustem Abiltarov. Rusiye Federal telükesizlik hızmeti olarnı Rusiyede terroristik teşkilât olaraq tanılğan«Hizb ut-Tahrir» teşkilâtınen bağlı olğanını ayta.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
