«Hizb ut-Tahrir davasınıñ» mabuslarını Rusiyede akimiyetni zornen zapt etüv ile qabaatlay bileler, dep bildire Qırım advokatı Emil Kürbedinov Facebookta yanvar 12-de.
«Rusiyede akimiyetni zornen zapt etüv (Rusiye Federatsiyası Ceza kodeksiniñ 278-inci maddesi) – yarından başlap Hizb ut-Tahrirde iştirak etmesi ile qabaatlanğan qırımtatar musulmanlarını bu madde boyunca mahküm ete bileler. 205.5 maddesine «ilâve» olaraq Ceza kodeksiniñ 278-inci maddesi qoşula bile, 12 yıldan 20 yılğa qadar azatlıqtan marum etilmeleri mümkün», – dep yazdı Kürbedinov.
Advokatnıñ aytqanına köre, bu neticelerni işğal etilgen Qırımnıñ mahkeme organlarınıñ qararlarını talil etip çıqardı.
«Rusiye Yuqarı Mahkemesi tarafından Ruslan Zeytullayevniñ «pek yımşaq ükmüniñ» lâğu etilmesi, mecburiy ceza psihiatriyasınıñ qullanılması ve Qırımnıñ tamır halqı, qırımtatarlarğa, Qırım musulmanlarına terrorist demeknen beraber Rusiyede akimiyetni zapt etecek telükeli cinayetçiler aytılması – Rusiye mahsus hızmetleriniñ deli añlayışında ve siyasiy yaşayışında bir zıncırnıñ alqalarıdır», – dep qayd etti advokat.
Qırım işğalinden soñ Rusiye mahsus hızmetleri yarımada zaptına qarşı çıqqan qırımtatarlar ve Ukrainağa qoltutqan faallerni taqip etmege başladı. Onlarnen insan, hususan Bağçasaray, Aqyar, Yalta ve Aqmescitten qırımtatarlar apiske alındı. 19 kişi Hizb ut-Tahrir islâm teşkilâtınd iştirak etmesi ile qabaatlanıp apiske alındı. Bundan ğayrı, Qırımda insanlar ğayıp olmağa devam ete. Bazıları ölü tapılğan, qalğanları aqqında bir haber yoq.
