Link açıqlığı

Rusiye Energetika naziri Aleksandr Novak dey ki, dekabr 30 kününden bü vaqıtqa qadar, işğal etilgen Qırımğa 20 million kubometr gaz yollanıldı. Nazirniñ sözlerine köre, yarımadağa Rusiyeniñ gaz-naqil sistemasından gaz kele.

Bunı Novak yanvar 11 künü Rusiye prezidenti Vladimir Putinniñ akimiyet ile keçirgen körüşüvi vaqıtında beyan etti. Körüşüv aqqında malümat Rusiye prezidentiniñ resmiy sitesinde yerleştirilgen.

«Dekabr 30 künü biz Rusiyeniñ gaz-naqil sistemasından eñ büyük yüklenüv vaqıtında gaz teminlep başladıq. Epsi olıp, bügünki künde endi 20 million kubometr gaz Qırım sakinlerine berildi. Umumen mında adiy vaziyet üküm süre. İşni devam etemiz», – dedi Novak.

Bundan evel Devlet Dumasındaki energetika komitetiniñ azası, Kreml kontrolündeki Qırım akimiyet yolbaşçısınıñ sabıq birinci muavini Mihail Şeremet degen edi ki, Rusiyeniñ Krasnodar vilâyetinden Qırımda keçirilgen yañı gaz borusı «şimdilik başlanuv ve tüzetüv işleri çerçivesinde» gaz keçire.

Dekabr 27 künü Rusiyedeki kütleviy haber vastaları, yarımadanıñ gaz-naqil sisteması qomşu Rusiyeniñ sistemasına qoşulğanı aqqında bildire ediler. Bildirüvlerge köre, 720 millimetr keñliginde gaz boruları, episi olıp, 341 km uzunlıqta quruldı, olardan 16 km – Keriç keçitiniñ altında keçirilgen.

XS
SM
MD
LG