Rusiye kontrol etken Qırımnıñ tasil, ilim ve gençlik nazirligi yarımada mekteplerine ressam İvan Ayvazovskiyniñ doğğanından 200 yıl keçkeni munasebetinen tedbir keçirmege avale ete. Bunı Qırım.Aqiqat mühbiri bildire.
Nazirlik mektübinde aytıla ki, 2017 senesi mekteplerde Ayvazovskiyge bağışlanğan seminar, sergi, tögerek masa, icadiy yarışlarnı planlaştırmaq ve keçirmek kerektir.
İvan Ayvazovskiy (Ovanes Ayvazân) 1817 senesi iyül 29-da Kefede dünyağa keldi. Ressamlıq merağı onı Peterburgdaki resim akademiyasınıñ binasına alıp keldi. 1847 senesi bu akademiyanıñ professorı ola. Ayvazovskiyniñ deñiz manzaraları eñ meşurdır. Olarnıñ arasında – «Doquzıncı dalğa» («Devâtıy val»), «Qara deñiz». Diger levhaları arasında: Kavkaz, ukrain manzaraları, ermeni tarihı, Qırım cenki. İvan Ayvazovskiy aman-aman altı biñ eserniñ müellifidir.
Tuvğan şeeri Kefege inkişaf etmege yardım etken edi. Anda qadimiylik müzeyini qurdı, resim galereyasını açtı, Canköyge qadar demir yol qurulmasına issesini qoşqan edi.
2014 senesi Rusiye Qırımnı işğal etken soñ Ayvazovskiyniñ Kefedeki resim galereyası Kreml kontrol etken Qırım akimiyetiniñ qoluna keçkendir.
