Kyivniñ apellâtsion mahkemesi Qırım Muhtar Cumhuriyeti prokuraturasınıñ muracaatını qabul etip, yarımadanıñ eki sabıq deputat Vitaliy Nahlupin ve Svetlana Savçenkonıñ cinaiy işleri baqılacaq yerlerni belgiledi.
«Mahkeme qararına binaen, sabıq deputat Nahlupinniñ işini Kyivniñ Svâtoşin rayon mahkemesi, sabıq deputat Savçenkonıñ işini ise Kyivniñ Peçersk rayon mahkemesi baqacaqtır», – dep aytıla Qırım Muhtar Cumhuriyeti prokuraturasınıñ matbuat hızmeti paylaşqan haberde.
Bundan evel Qırım Muhtar Cumhuriyetiniñ prokuraturası Qırımnıñ eki sabıq deputatı Remzi İlyasov ve Vladimir Klıçnikovnıñ işleri baqılacaq yerler aqqında bildirgen edi. İlyasovğa qarşı dava Solomen rayon mahkemesinde, Vladimir Klıçnikovnıñ ini ise Dnepr rayon mahkemesinde baqılacaqtır
Cinaiy işlerniñ taqiqatı devamında Qırım Muhtar Cumhuriyetiniñ prokuraturası «2014 senesi mart ayında Qırım Muhtar Cumhuriyeti Yuqarı Şurasınıñ bu deputatları Qırım işğaline yardım etkenini ve qoltutqanını isbatlağan» deliller taptı.
2016 senesi dekabr ayınıñ soñunda Qırım Muhtar Cumhuriyetiniñ prokuraturası mahkemeden aldın taqiqatnı yekünlep, Qırımnıñ sabıq deputatlarına qarşı çıqarılğan qabaat qararlarını mahkemege yolladı. Sergey Tsekov, Svetlana Savçenko, Konstantin Baharev, Edip Gafarov, Anatoliy Zaiçenko, Remzi İlyasov, Grigoriy İoffe, Vladimir Klıçnikov, Vitaliy Nahlupin, Yefim Fiks, Sergey Şuvaynikov Ukraina Ceza kodeksiniñ 111-inci maddesiniñ 1-inci qısmındaki (devlet hainligi) cinayet işlemesi ile qabaatlana.
