Kreml kontrol etken Qırım Yuqarı mahkemesi Yaltalı «Hizb ut-Tahrir davasınıñ» mabusı Vadim Siruknıñ apis cezasınıñ uzatılmasından bergen şikâyet arizasını qanaatlendirmedi. Bunı yanvar 11-de Qırım advokatı Emil Kürbedinov Qırım.Aqiqatqa bildirdi.
«Oturış keçti, neticeleri tahmin etilgen edi. Mahkeme Vadim Siruknıñ apis cezasını uzatmaq qararını deñiştirmedi. Böylece, şikâyet arizası qanaatlendirilmedi. Emir-Üsein Kukunıñ şikâyet arizası boyunca da netice aynı olacaqtır», – dep ayttı Kürbedinov.
Onıñ bildirgenine köre, Vadim Siruknıñ apis cezası uzatılğanda onı mahkemege ketirmegen ediler.
«O, mecburiy psihiatrik ekspertizada edi. Cinaiy uquq sert bir şekilde bozuldı. Buña bile esaslanıp, mahkeme apis müddetiniñ uzatılması qararını lâğu etmek kerek edi, amma bunı yapmadı. Emir-Üsein Kuku aynı vaziyette: o da mecburiy ceza psihiatriyasında edi», – dep qoştı advokat.
Kürbedinovnıñ qayd etkenine köre, imaye Halqara insan aqları mahkemesine ve Halqara ceza mahkemesine iş malümatlarını berecektir.
«Hizb ut-Tahrir» davasınıñ Yaltalı iştirakçileri yarım yıldan ziyade apiste yata. Birinci dört kişi 2016 senesi fevral 11-de yaqalanğan edi. Olarnıñ arasında İnsan aqları bağ gruppasınıñ azası Emir-Üsein Kuku da bar. Ondan ğayrı qurucılıqnen oğraşqan Aluşta sakini Müslim Aliyev ve Qızıltaş köyüniñ sakini Enver Bekirov, ve Yaltalı çeçek satıcısı Vadim Siruk da yaqalanğan edi.
Uquq qorçalayıcılar apiske alınğan Yalta sakinlerini siyasiy mabus olaraq tanıy.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
