Link açıqlığı

Qırımtatar halqınıñ lideri, halq deputatı Mustafa Cemilev Amerika Qoşma Ştatlarınıñ prezidenti Barack Obama memleketine veda sözünen muracaat etip, Qırım işğaline vaqıt ayırmağanına yazıqsındı. Bunı o Qırım.Aqiqatqa ayttı.

«Obama veda çıqışınıñ büyük qısmını Rusiyeniñ Ukrainağa ve diger memleketlerge qarşı istilâiy siyasetine qarşılıq meselelerine bağışlasa; Qoşma Ştatlarnıñ yañı memuriyeti Ukrainağa topraq bütünliginiñ tiklenmesinde daa çoq qoltutacağına ümüt etkenini bildirse; bu memleket (Rusiye – QA) toprağımızda yapqan cinayetler içün halqara mahkemege mesülietke çekilecegini aytsa edi, yahşı olur edi», – dep tüşüne o.

Cemilevniñ aytqanına köre, Obama nasıl olsa da, yapqan çıqışında bütün dünya meselelerini aytıp olamaz edi ve, Ukraina añılmasa da, – «zararı yoq».

«Onıñ sözü sekiz yıl devamında memuriyeti nege irişkenine ve memleketi ögünde ne kibi meseleler bar olğanına bağışlandı. Normal bir şey, mence», – dep yekünledi qırımtatar halqınıñ lideri.

Salı künü AQŞ prezidenti Barack Obama memleketine veda sözünen muracaat etti. O, siyasiy faaliyeti başlağan Chicago şeerinde çıqışta bulundı.

XS
SM
MD
LG