Herson vilâyetine ve Qırımğa yayın dağıtacaq TV qullesi Çonğarda bügünki künde 96 metr yükseklikke qadar quruldı. İşçiler, yanvar 11 künü 106 metrlik yükseklikke yetişmege planlaştıra ediler, lâkin ava şaraitleri qurucılıq içün kelişmedi. Bunen beraber, dört ukrain radionıñ Qırımğa yollaycaq yayınlarınıñ deñemesi endi bu ayda ötkerilecegi beklenile.
Bunı Ukraina TV ve radio yayınlav sualleri boyunca Milliy şura azası Sergey Kostinskiy Qırım.Aqiqatqa bergen izaatında haber etti.
O dedi ki, şimdiki vaqıtta «ne tehnika, ne de maliye ceetinden problemler yoq», qulleniñ qısımları ve donatmalar barlar.
«Bu RTPS (Radio ve TV berici stantsiya) yanvarnıñ soñunda açılacağı beklenile. Bundan soñ, litsenziya alğan radiostantsiyalar yayınlarını başlaycaqlar. Er bir radiostantsiya yıl devamında yayınlarını başlatmaq içün azırlana bile. Men belesem, keçiktirüvler de olmaq mümkün, lâkin test yayınları bu aynıñ soñunda ötkerilmek kerek», – dedi Kostinskiy.
Dekabr 2 künü Çonğarda TV ve radio qullesiniñ temeline birinci blok qoyuldı. Qulleniñ yüksekligi – 150 metrni teşkil etecegi beklenile. Qulle sayesinde dört ukrain radiostntsiyası Herson vilâyeti ve Qırımda yayınlarını başlatacaq. FM dalğalarında yayınlar – Canköy, Krasnoperekopsk rayonlarını ve qısmen Aqmescit rayonını qaplap alacaq.
Ukraina TV ve radio yayınlav sualleri boyunca Milliy şura tarafından 2016 senesi 27 dekabrde dört radiostantsiyağa litsenziyalar berildi, olar Qırımğa yayın yapa bilecekler. Bu – Ukrain radiosı (cemaat yayınları), Hersondaki yerli radiostantsiya, «Meydan» qırımtatar radiosı, «Radio krımskih gromad».
Qırım.Aqiqat Radiosınıñ ortağı – «Radio krımskih gromad» cemaat teşkilâtı Qırımda 105.9 FM dalğasında yayın yapmaq içün litsenziya aldı.
