Ukrainanıñ Avropa Şurasındaki daimiy temsilcisi Dmıtro Kuleba, Qırım sakinlerini qorçalamaq içün tedbir almağa çağırdı. Bunı diplomat Twitter saifesinde yazdı.
«Avropa Şurası Nazirler komitetiniñ 2017 senesinde ilk toplaşuvını keçirdik. İşdeşlerime bayramlardan soñ keyflerini bozmağa istemez edim, lâkin rusiyelilerniñ Qırımda ukrain vatandaşlarına nisbetten yapqan basqıları aqqında aytmamaq mümkün degil edim. Avropa Şurasınıñ organlarını ve devletlerini, bizimkilerni qorçalamaq içün tedbir almağa çağırdım», – dep yazdı Kuleba.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ işğal ve ilhâq etilmesini qanunsız areket olaraq tanıdılar. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
