İşğal etilgen Qırımnıñ memuriy sıñırında sıñırcılar, olarğa nisbetten qorqutuv areketleri yapılğanı aqqında bildireler. Müessisede deyler ki, «kontrabandacılar sıñırcılarnı qorqutıp işlerine keder etecek olalar».
Ukraina Devlet sıñır hızmetiniñ matbuat hızmeti yanvar 11 künü bildirdi ki: «Tünevin Berdânsk otrâdınıñ sıñır hızmeti bölüklerden birine reberlik yapqan yolbaşçınıñ evine taş atıp penceresini qırdılar. Aynı otrâdnıñ sıñırcılarından daa birisiniñ kvartira qapısına, qanun bozğanlar avcılıq tüfeginden ateş açtılar. Çastlarına, kimse bu areketler neticesinde zararlanmadı, Devlet sıñır hızmetiniñ hadimleri bu vaqıtta işte ediler».
Qayd etilgenine köre, Milliy politsiya vekilleri qanunsız areketlernen bağlı vaziyetni taqip ete ve qabaatlılarnı qıdıra.
Müessisede qayd ettiler ki, «bundan evel de, belli olmağan şahıslar tarafından sıñır qoruyıcılarını qorqutmaq ve olarğa mahsus zarar ketirip, tesir etmek içün, bu kibi ıntıluvlar yapılğan edi», 2016 senesi devamnda 33 kere sıñırcılarnı qorqutmaq maqsadı ile basqı yapılğan edi. Ukraina Devlet sıñır hızmetiniñ matbuat hızmeti, altı kere cinayetçiler sıñırcılarnıñ arbiy arabalarını yaqqanlarını bildirdi.
