Keriçte qapaqsız qalğan kanalizatsiya quyularınıñ sayısı bir biñge qadar yetti. Bunı Kreml kontrolündeki şeer memuriyetiniñ yolbaşçısı Vladimir Podlipentsev yanvar 11 künü Facebookta beyan etti.
Onıñ sözlerine köre, açıq kanalizatsiya quyuları – «şeerniñ acele problemlerinden biridir».
«Keriçliler bu mesele boyunca daima memuriyetke muracaat eteler. Meseleniñ mürekkepligi şu ki – Keriçte biñge yaqın açıq quyu bar. «Voda Krıma» devlet quruluşınıñ Keriçteki bölüginde bu quyularnı birden qapaqlamaq içün çaresi yoq, lâkin bu yöñelişte işler alıp barıla», – dep aytıla bildirüvde.
Şeer memuriyet yolbaşçısı dey ki, dekabr ayında «Voda Krıma» teşkilâtınıñ Keriçteki bölügi şeerniñ çeşit rayonlarında 33 adres boyunca 53 quyuğa qapaq pekitti, ve bu iş, Podlipentsevniñ sözlerine köre, devam ettirilecek.
Keriçte kanalizatsion qapaqlar sıq-sıq hırsızlanıla. Qırım Rusiye tarafından işğal etilmezden evel, Keriçteki uquq qoruyıcılar, hurda demir toplanılğan noqtalarnı teşkirip, hırsızlanılğan qapaqlar qayda ketirilgenini tapa edi. Şeer memuriyeti, kanalizatsion quyularnı plastik qapaqlarnen qapatıp, hırsızlıqnen küreşmege tırışa edi.
