AQŞ Devlet kâtibi John Kerry Ukrainağa istilâ etkeni sebebinden Rusiyege qarşı sanktsiyalarnıñ kirsetilmesinde Amerika Qoşma Ştatlarınıñ rolü ne qadar müim olğanını hatırlattı.
Yañı saylanılğan prezident Donald Trumpnıñ idaresi 20 yanvarde iqtidarğa keleceginiñ arfesinde Washingtonda keçirilgen «Passing the Baton» («Estafetanı devam etmek») konferentsiyası devamında John Kerry hatırlattı ki, şimdiki prezident Barack Obamanıñ idaresi Avropa tarafından da sanktsiyalarnıñ qullanılmasına irişti. Bunı Radio Svoboda haber ete.
«Rusiye Gürcistanğa ücüm etip, Cenübiy Ostiya ve Abhaziyanı istilâ etkeninden soñ, biz iç bir şey yapmağan edik – sanktsiya qullanmadıq, iç bir tedbir almadıq. Bizler (Obamanıñ idaresi – QA) kelgen soñ, olar ise Ukrainanı istilâ etkenlerinden soñ, biz Avropanı köterdik ve sanktsiyalarnı kirsettik. Bu sanktsiyalar Rusiye içün ağır darbe oldı, o yapqan bütün areketleri içün ödemek mecbur olğanını añladı. Ve Avropadaki çoqusı, instinkt olaraq, bu sanktsiyalardan vazgeçmege istegende, bizler devamlı surette olarnı Minsk añlaşmalarını yerine ketirmege mecbur ettirmek içün saqlap oldıq», – dep hatırlattı Kerry.
Ukraina ile bağlı olaraq, Qırımnıñ Rusiye tarafından işğal etilmesi ve soñra Ukraianıñ şarqiy vilâyetlerine ücüm etkeninden soñ, bir-qaç paket ile AQŞ ve diger devletler, ilk evelâ «Gruppadaki Yedi» devletleri ve Avropa Birligi tarafından yaptırımlar qabul etilgeninden ğayrı, Washington Moskvağa qarşı diger sanktsiyalarnı da qullanğan edi. Soñkileri – daa küçlü diplomatik yaptırımlar oldı, olar Rusiyeniñ yüksek reberleri tarafından AQŞ saylavları devamında siber-qarışuvalarını keçirmek emir etilgeni AQŞ mahsus hızmetleri ile tasdiqlanğanından soñ qabul etilgen ediler.
Trump ve onıñ taqımını temsil etkenler bu sanktsiyalarğa qarşı çıqqan ediler. Saylanılğan prezidentniñ baş mesleatçısı Kellyanne Conway dedi ki, soñki yaptırımlarnıñ bazılarını Donald Trump lâğu ete bile, çünki onıñ fikirince, siber-qarışuvalar sebebinden qabul etilgen yaptırımlarnıñ bir qısımı kereginden ziyade şiddetli oldı. Ve o, qanun çıqarıcılarınıñ çoqusı, Rusiyeniñ saylavlarğa siber-qarışuv yapqanını tedqiq etmek içün eki fırqalıq Kongress tedqiqatını keçirmege avesli olğanlarında, şubelengenini bildirdi.
