Link açıqlığı

Dekabr 10, salı künü Kreml nezaretindeki Aqmescitniñ Kiyev rayon mahkemesi «Hizb ut-Tahrir» işiniñ dört iştirakçisine apis müddetini uzattı. Remzi Memetov, Enver Mamutov, Zevri Abseitov ve Rustem Abiltarov 12 aprelge qadar serbeslikten marum etilgenler. Bunı advokat Emil Kurbedinov Qırım.Aqiqatqa bergen izaatında bildirdi.

«Bağçasaraylı dört yigitniñ apis müddetini aprel 12 kününe qadar uzattılar. Olardan ekisini mahkemege ketirmediler bile: Memetovnı ve müşterim Mamutovnı. Çünki olar mecburen psihiatrik statsionarğa yerleştirilgenler. Olğan qanunlarnı bozıp, olarnı episi bir ketirmediler. Qalğan ekisi (Zevri Abseitov ve Rustem Abiltarov – QA) konventsiyağa uyğun olmağan şekilde – mahkeme toplaşuvı salonında «qafeste» tutıla ediler», – tarifledi Kurbedinov.

Advokatnıñ sözlerine köre, mahkeme toplaşuvı kiçkene salonda keçirildi ve diñleyicilerniñ bir qısımını anda yibermediler.

«Men özüm kördüm ki, diñleyiciler bu munasebet ile mahkeme binasında şikâyetler yazıp qaldırdılar. Men bellesem, olar diger müessiselerge de muracaat etip, olarnı, diñleyiciler olaraq, yibermegenlerine qarşı şikâyet etecekler», – dedi o.

Kurbedinov, mahkemeniñ bu qararına qarşı da şikâyet etilecegini bildirdi, çünki bu qarar «esassız qabul etilgen».

Mayıs 12 künü 2016 senesi Bağçasarayda rusiye silâlı hızmetleri bir sıra musulmannıñ evinde ve yerli qavehanede tintüv keçirdi. Neticede dört Bağçasaray sakini yaqalandı: Enver Mamutov, Remzi Memetov, Zevri Abseitov ve Rustem Abiltarov. Rusiye Federal telükesizlik hızmeti olarnı Rusiyede terroristik teşkilât olaraq tanılğan«Hizb ut-Tahrir» teşkilâtınen bağlı olğanını ayta.

«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.

XS
SM
MD
LG