Qırımnıñ Qarasuvbazar rayonında yanvar 8 künü Qırımtatar milliy areket iştirakçisi Veciye Kaşkanıñ evinde dissident, cemaat erbabı ce uquq qorçalayıcı Andrey Saharovnıñ hatırasına añuv merasimi keçirildi. Bunı yanvar 10 künü Qırım.Aqiqat muhbiri haber ete.
Merasimge qırımtatar faalleri ve Milliy areket veteranları keldi.
Çoqusı qırımtatarlarnıñ taqdirinde Andrey Saharovnıñ sahsiyeti yer alğan edi. Böylece, ancaq Andrey Saharovnıñ şefaatı sayesinde Veciye Kaşka ve onıñ ailesi Qırımda yazılıp olğan edi, albu ki bundan evel o 1970-ci yılları üç defa Vatanına – Qırımğa qaytmağa tırışqan edi ve Qırımdaki akimiyet tarafından basqılarğa oğratıla edi. Qırımda yaşamaq içün izin almaq maqsadınen o Moskvağa – Saharovğa barıp, onı yardımğa çağırğan edi.
«Saharovnı ziyaret etken soñ, men KGB-ge muracaat etip, meni Qırımda yazdırmağa rica ettim. Menim ögümde şart qoydılar: Saharovqa barmamaq, onıñ adresini qırımtatarlardan iç bir kimsege bermemek. Men dedim: «Yoq! Saharovğa bara edim ve daa baracam», – dep hatırlay Veciye Kaşka.
Merasimde iştirak etken Meclis reisiniñ muavini İlmi Umerov, 1987 senesi Qırımtatar milliy areketiniñ adiselerinden bir vaqia hatırladı: «Menim doğmuş qardaşım Bekir Umerov Krasnodar vilâyetiniñ Krımsk şeerinde uzun müddetli açlıq tuta edi. Andrey Saharov öz mektübinde oña muracaat etip, öz ayatını telükege atmamağa rica etti. Saharovnıñ muracaatına qulaq asıp, Bekir açlıqnı toqtatqan edi».
Qırımtatarları, sürgünlik yerlerinden ana-topraqlarına qaytmaq ve aqlarını yañıdan tiklemek içün küreş alıp barğanları vaqıtta 1960-1980-ci yılları devamında Andrey Saharovnıñ bergen destegi içün oña minnetdarlıq bildireler. Saharovnıñ yardımı ile qırımtatarlarnıñ meselesi, Sovetler Birliginde tanılmağanı vaqıtta, halqara seviyege çıqarılğan edi.
Dekabniñ başında qırımtatar halqınıñ lideri, Ukraina millet vekili Mustafa Cemilev, Andrey Saharovğa ayatı ile borçlu olğanını aytqan edi.
