Link açıqlığı

Rusiye sıñırcıları yarımadağa kirmek içün soyadını deñiştirgen Ukraina vatandaşı yaqalanğanını bildire. Bunı yanvar 10-da Kreml kontrol etken FSB sıñır idaresiniñ matbuat hızmeti haber etti.

Qayd etile ki, «vaqia yanvar 5-de «Or Qapı» maşina kiriş noqtasında yüz berdi». Herson vilâyetiniñ 43 yaşında sakini pasportını kösterdi, anda malümatlar ise Rusiyege kirişi yasaq etilgen insannıñ malümatları ile aman-aman aynı edi.

«Nezaretçiniñ soyadını deñiştirdiñizmi-yoqmı sualine erkek soyadını deñiştirmegenini aytıp, Ukraina vatandaşınıñ pasportını 2016 senesi oktâbr ayında eski vesiqasını coyğanından sebep aldım, dep cevap berdi. Faqat tafsilâtlı taqiqat neticesinde erkek Qırımğa barıp kelmek içün soyadını kerçekten deñiştirgenini ayttı», – dep qayd ete matbuat hızmeti.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ işğal ve ilhâq etilmesini qanunsız areket olaraq tanıdılar. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG