Türkiye Gürcistan ve Ukrainanıñ topraq bütünligine dair fikirlerini ğayrıdan baqmağa niyetli degildir. Bunı bazarertesi künü, yanvar 9-da, Türkiye Tışqı işler naziri Mevlüt Çavuşoğlu Ankaradaki elçiler konferentsiyasında çıqışta bulunıp ayttı. Onıñ qayd etkenine köre, Moskva ile iş birligi bunı qaplap almay, dep haber ete Eho Kavkaza.
«Bizler Ukraina ve Gürcistannıñ topraq bütünligine qoltutamız. Ukraina topraqlarınıñ işğalini tanımayıq. Rusiye ile dialog bir çoq zıddiyetni al etmege yardım etecektir», – dep ayttı Çavuşoğlu.
O, Suriye zıddiyetini aytıp, «Türkiye regiondaki er angi memleketten ziyade Suriyede istiqrar olmasını istey», dep bildirdi.
«Ankara Suriyede barışıq olsun dep, elinden kelgen er şeyni yapa. Suriye boyunca Jeneva esnasına qoltutamız ve bu memleketniñ şimalinde IŞİD ile küreşemiz», – dep ayttı Çavuşoğlu.
O, «Türkiye Suriyeniñ topraq ve siyaset bütünligine faal sürette qoltutmağa devam etecegini» aydınlattı.
