Bağçasarayda yaqalanğan «Hizb ut-Tahrir işiniñ» dört iştirakçisine qarşı apis müddetini uzatmaq içün mahkeme toplaşuvı Kreml kontrolündeki Aqmescitniñ Kiyev rayon mahkemesinde yanvar 10 kününe belgilendi. Bunı Facebookta advokat Emil Kurbedinov haber etti.
«Bağçasaraylı dörtke», olranıñ arasında Enver Mamutovqa da, apis müddeti yarın saat 14-te Aqmescitniñ Kiyev rayon mahkemesinde uzatılacaq!», – dep hatırlattı advokat.
Mayıs 12 künü 2016 senesi Bağçasarayda rusiye silâlı hızmetleri bir sıra musulmannıñ evinde ve yerli qavehanede tintüv keçirdi. Neticede dört Bağçasaray sakini yaqalandı: Enver Mamutov, Remzi Memetov, Zevri Abseitov ve Rustem Abiltarov. Rusiye Federal telükesizlik hızmeti olarnı Rusiyede terroristik teşkilât olaraq tanılğan«Hizb ut-Tahrir» teşkilâtınen bağlı olğanını ayta.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
