Link açıqlığı

Tarihçı Gayvoronskiy yazğan kitabı esasında Qırımnıñ keçmişini ve şimdiki vaziyetini qıyasladı


Qırım tarihçısı Oleksa Gayvoronskiy

Qırım tarihçısı Oleksa Gayvoronskiy, «Eki qıtanıñ ükümdarları» («Poveliteli dvuh materikov») eki tomlıq kitabınıñ müellifi, taqdim etken kitabı esasında qıyaslama yaptı.

«Tomlarnı üçünci kere bastırmağa azırlanğanda olarnı bir qaç kere oqup çıqtım. Olarnıñ finalını oqup, tarihiy tecribeniñ yıllarına dair çıqarğan neticelerimni körgende tüşüncege daldım. Birinci tom ükümdarlar kelip kete, halq ise qala kibi fikirnen yekünlene. Ekinci tom ise eñ müim küç cesaretlik ve qararlıq degil, birlik ola söz ibaresinen bite. Doğrusını aytqanda, 2007 senesi bu sözler 10 yıldan soñ ne mana taşıycağını tasavvur etip olamay edim», – dep ayttı Gayvoronskiy.

Onıñ bildirgenine köre, kitap obyektivizm qaidelerine köre degil, «Qırımmerkez» ola kibi yazılğan.

«Ğururlanam, çünki özüme böyle bir levha köz ögüne ketirdim, yurtnıñ keçmişine bu ceetten baqtım ve oquyıcılarğa bunı yetkizip oldım. Al-azırda vaziyetni bu ceetten közetmek pek müim, çünki şimdi eki qıta yapışaq bataqqa çevirile, Qırım ise ayaqta qalmağa yardım etken qattı bir noqta olıp qala», – dep qayd ett müellif.

Malüm ki, Qırımda tarihçı, yazıcı ve alıp barıcı Oleksa Gayvoronskiyniñ «Eki qıtanıñ ükümdarları» kitabı yañıdan basıldı.

Oleksa Gayvoronskiyniñ qayd etkenine köre, öz kitabında o oquyıcılarğa «aralarında Geraylarnıñ devleti turğan, eki qıtanıñ topraqlarında seyaat etmege» teklif ete. «Eki qıtanıñ ükümdarları» kitabında Qırım hanlığınıñ peyda oluvı ve tiklenüvi deviriniñ vaqiaları ve yarımada akimleriniñ süretleri taqdim etilgen.

«Eki qıtanıñ ükümdarları» kitabı 2010 senesi dünya yüzüni körgen edi.


XS
SM
MD
LG