Link açıqlığı

Qırımtatar Milliy Meclis reisiniñ muavini İlmi Umerov, Rusiye maliye nezaretiniñ terroristler cedvelinde nasıl tapılğanı aqqında tafsilât belli oldı. İşğal etilgen Qırımnıñ prokuraturası tarafından Rusiyeniñ territorial bütünlügine qast etkeninde qabaatlanğan İlmi Umerov, yanvar 4 künü «Hromadske TV» efirinde vaziyetni özü añlattı.

«Men bu cedvelde bar olğanımnı tesadüfen ögrendim. Bese-belli, bu cedveler çoqtan berli tertip etilgenler, men olarnıñ tertip etilgen tarihını bilmeyim. Yañı yıldan ögüne men borçlardan qurtulmağa qarar aldım, ve 22 sentâbr 2016 senesi Meclis toplaşuvında iştirak etkenim içün işğalci akimiyetiniñ mahkemesi tarafından maña belgilengen para cezasını töleycek oldım», – dedi Umerov.

Lâkin memuriy qanun bozuvı içün tain etilgen kiçik cezanı töleycekte, Aqmescitte RNKB bankınıñ bölüginde ödememi qabul etip olamadılar. Aqmescitte ödemeni Umerovnıñ advokatı ve onıñ yardımcısı tölemege tırışqan ediler. Bağçasarayda da onıñ qızı Ayşe banknıñ bölüginde ştrafnı ödep olamadı. İlmi Umerov bank bölügine kelgen soñ, bank hadimleri, idarecilerinen aqıl tanışıp, añlattılar ki, o «bir de bir ekstremistler cedvelinde bar olğanından» sebep kompyüter onıñ ödemelerini qabul etmey.

Evge qaytıp, Meclis reisiniñ muavini İnternette Rusiye maliye nezaretiniñ terroristler cedvelini taptı. Cedvege tahminen 7000 insan kirsetilgen ve o bu cedvelde 5826-cı satırda, kerçek terrorist ve ekstremist olaraq keçe.

İlmi Umerov, özüniñ mezkür cedvelge kirsetilmesini – öz fikirini açıqtan ifade etmek ve 2014 senesi Qırımda kerilgen «referendumnen» razı olmamaqqa qarşı zulum olaraq tanıy.

Bundan ğayrı, İlmi Umerovnıñ fikirine köre, onıñ ekstremistler cedveline kirsetlmesi – bu «öz ekseriyetinen, Qırımnıñ Rusiye Federatsiyası tarafından kontrol etilmesine qarşı çıqqan, bunı qabul etmegen qırımtatar milletine basqı çeşitidir. Bu – er kesni qorqutmaq içün yapılacaq tedbirler zıncırınıñ daa bir alqasıdır».

Meclis reisiniñ muavini, Rusiye maliye nezaretiniñ terroristler cedveline öz adınıñ kirsetilmesine qarşı şikâyet ile mahkemege muracaat etmege niyetli.

İlmi Umerovğa qarşı ekstremizm maddesi boyunca cinaiy iş FSB darafından 2016 senesi mayıs 12 künü açılğan edi. Meclis reisi muavininiñ yaqalanuvı, tintüvi ve oña qarşı cinaiy işniñ açılması, mecburiy surette mahkeme-psihiatrik ekspertizanıñ keçirilmesi içün onıñ delihanege yerleştirilmesi – cemiyette ve dünyada razonans çıqarğan edi.

XS
SM
MD
LG