Telükeli şaraitlerde çalışqan uquq qorçalayıcılar aqqında malümat toplağan «Frontlinedefenders» teşkilâtınıñ er yıllıq esabatında Qırımdaki taqımlarnıñ işi de qayd etilgen.
«Qırımda uquq qorçalayıcınıñ işi ciddiy zorluqlarnen, meselâ, büyük telükenen bağlı. Yani, o er zaman Rusiye mahsus hızmtleri tarafından taqip etilmek mümkün. Bunen beraber bu iş ağır duyğularnen alıp barıla. Zarar körgenlernen doğrudan-doğru qonuşmağa kerek ola. Böyle şeyerni körüp, uzun vaqıttır özüne kelip olamaysıñ, lâkin çalışmağa kerek, duyğularğa qapılmaq aqqıñ yoq. Qırımdaki uquq qorçalayıcılar ofislerde çalışıp olamaylar, çünki problemalar çıqmaq mümkün. Albu ki, añlaşılğanı kibi, ofis, itişam içün degil de, bazı tehnikanı yerleştirmek, vatandaşlarnı qabul etmek içün kereklidir...», – dep, Qırım insan aqları bağ gruppasınıñ koordinatorı Abdureşit Cepparov uquq qorçalayıcılarnıñ vaziyetini Qırım.Aqiqat içün izaatladı.
Onıñ sözlerni köre, Qırımdaki uquq qorçalayıcılar büyük telükede çalışqanlarınen beraber olarğa maliyeviy destek berilmey.
«Men «Frontlinedefenders» teşkilâtına, vaziyetni taqip etkenleri ve Qırımlı uquq qorçalayıcılar içün müyim olğan bu meselelerni köergenleri içün minnetdarım», – dedi Cepparov.
Qırımdaki uquq qorçalayıcıarnıñ işine az diqqat ayırılğanı ve maliyeviy qıtlıq aqqında Abdureşit Cepparov evel de beyan ete edi.
Qırım insan aqları bağ gruppası yarımadada eki yıldan ziyade çalışa. Qırımtatar uquq qorçalayıcıları, 2014 senesi senâbr 27 künü Qarasuvbazarda qırımtatar milliy areket iştirakçisi Abdureşit Cepparovnıñ oğlu ve qardaşınıñ oğlu qaçıqırlğan soñ birleşken ediler. Gençler aqqında şimdige qadar iç bir şey belli degil. Bu gruppanñ azaları olğan uquq qorçalayıcılar, qırımtatarlarnuñ ğayıp olmasını, qırımtatar faaleriniñ yaqalanması ve apis etilmesini taqip eteler, yaqında ise Qırımdaki siyasiy mabuslarğa imaye berip başladılar.
