«Krımska svitlıtsâ» («Qırım odası») gazetasına 2018 senesi ayrı maliye maddesi berilmelidir. Memleket bücetinde kelecek seneniñ masraflarına dair maddeni dört nazirlik baqa bile. Böyle bir fikirni «Milliy gazeta-mecmua neşriyatı» devlet müessisesiniñ baş müdiri Andrey Şçekun Qırım.Aqiqatqa seslendirdi.
«Krımska svitlıtsâ» siyasiy alet statusına saiptir, bu mesele haber siyaseti nazirligi, işğal etilgen topraqlar nazirligi, Ukraina medeniyet nazirligi ve tışqı işler nazirligi tarafından baqılmaq kerek. Mence, Nazirler şurası bunı baqıp, 2018 senesi ayrı maliye etilmesini kirsetmek kerek, çünki bugünde-bugün «Krımska svitlıtsâ» lâyıq bir seviyede maliye etilmey», – dep ayttı Şçekun.
Onıñ qayd etkenine köre, Qırımnıñ ukrain tilli neşiriniñ çalışacaq yeri yoq, neşriyattaki diger muarririyetlerniñ iş yerlerini almağa mecbur. Kerekli tehnika da yoq – yekâne muarrir bilgisayarını göñülliler ediye etti.
Muarririyet neşirni inglizcege tercime etmege azır, faqat bu ğayeniñ amelge keçmesi içün maddiy yardım kerek, dep qayd ete neşriyatnıñ baş müdiri.
«Krımska svitlıtsâ» Qırımda 1992 senesinden berli basılğan edi.
2016 senesi mart 14-de «Milliy gazeta-mecmua neşriyatı» devlet müessisesi baş müdiriniñ muarririyetniñ Aqmescitten Kyivge avuştırılmasına dair buyruğı çıqtı. İyün başında ilân etilgen «Krımska svitlıtsâ» gazetasınıñ baş muarriri yarışı neticesinde aqmesjitli filolog Viktor Merjvinskiy ğalebe qazandı.
