Rusiye Cemaat nezaret komissiyasınıñ (CNK) uquq qorçalayıcıları mahküm etilgen faal İldar Dadinni Altay ülkesiniñ beşinci apishanesinde yanvar 6-da tapmadı. Bunı Dadinniñ ömür arqadaşı Anastasiya Zotova Facebook saifesinde yazdı.
Rusiye uquq qorçalayıcısı Lübov Volkova Rusiye mustaqil közeticileri birligine faal Altay ülkesiniñ apishanesinde bulunğanına dair tasdıqlanmağan bir malümat kelgenini bildirgen edi.
Cumaaqşamı künü, yanvar 5-de, Rusiyede insan aqlarından vekâletlisi Tatyana Moskalkova Dadin yanvar 9-10 künleri yañı apis yerine avuştırılacaq ve bundan soñ tuvğanlarından biri ile telefonda laf etmege imkânı olacaq, dep haber etti.
Dekabr 5-de belli oldı ki, İldar Dadin azap çekkenini bildirgen Segeja apishanesinden çıqarıldı. O künden berli onıñ bulunğan yeri belli degil. Rusiye cemaat faalleri, jurnalist, yazıcı ve vatandaş faalleri akimiyetten faalniñ bulunğan yerini aydınlatmağa talap eteler.
İldar Dadin – Rusiyede «cemaat tedbirlerini keçirüv qaideleriniñ bir qaç kere bozulması» maddesine köre mahküm etilgen yekâne faaldir. Onı eki buçuq yılğa qadar apiske alğanlar.
