İşğal etilgen Qırımda Rusiyeden kelgenlerge daa çoq imkân berile, yerli ealiniñ aq-uquqları ise bozula. Qırımlılar özüni sıq-sıq «ekinci sınıf adamları» sayalar, çünki iş yerleri qısqartılsa, ilk evelâ olarnı işten boşatalar. Bunı Qırım ruhiyatçısı Larisa Voloşina Qırım.Aqiqat Radiosınıñ saba yayınında ayttı.
«Yavaş-yavaş çıqaralar, çünki, birinciden cemiyetni bozalar, umumiy bağlarnı, toplulıq olaraq kimliklerini yoq eteler. Ekinciden, bu bağlar üzülse, insanlarnıñ bir qısmı tamamen mefküre, «lider» ve «memleketke» boysunacaq, yani büyük şahsiyet çizgilerini bütünley coyacaq. Ekinci qısmı ise, boysunıp olamağan, Qırımnı terk eter. Bugünde-bugün ayta bilemiz ki, Rusiye Qırımda Qırım toplulığını yoq etüv siyasetini alıp bara», – dep ayttı Voloşina.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ işğal ve ilhâq etilmesini qanunsız areket olaraq tanıdılar. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
