Link açıqlığı

Qırım ve Aqyar musulmanları diniy idaresi (QAMDİ) Qırımda islâm temellerini ögrenmege celp etecek yarışlarnı keçire. Bu sene qadın-qızlar arasında «Hayrunnisa» Qırım yarışınıñ azırlığı başladı, onıñ finalı fevral ayında ötkerilecektir, dep bildire QAMDİ matbuat hızmeti.

«Aynı vaqıtta «Mektepten aldın balalar ve küçük mektep talebeleriniñ din temelleri ocası» kurslarınıñ azırlığı yekünlendi. Talebeler qabul etile. Ocalar arasında islâm temellerini ögretecek eñ eyi usuliyet dersligi yarışı başladı. Bundan ğayrı, ocalar islâm temelleri kursları açılacaq yañı regionlarnı belgiledi», – dep qayd etile QAMDİ haberinde.

Qırım müftisi acı Emirali Ablayev «Faydalı ilim» maarif leyhası çerçivesinde çalışqan islâm temelleri ocalarınen körüşti.

Aqmescitteki QAMDİ malümatına köre, 2016 senesi islâm temelleri ocalarınıñ sayısı 56 insannı teşkil etti. Qırımda bazar künleri çalışqan 74 mektep bar. İslâm temellerini ögrengenlerniñ sayısı 500-den ziyadedir.

2014 senesi Rusiyeniñ Qırım işğalinden soñ QAMDİ yapqan areketlerini Meclis ile muzakere etmey. Yanvar 16-17 künleri Herson vilâyetiniñ Geniçesk rayonında olıp keçken Dünya qırımtatar kongressi icra şurasınıñ toplaşuvında esas Ukrainada Müftiylikni qurmağa qarar alındı.

2016 senesi noyabr 19-da 14 qırımtatar din cemiyeti Kyivde toplaşіp, müftiylikni qurdılar. Müfti Ayder Rustamov oldı, o, Kyivdeki qırımtatar cemiyeti yanında Musulmanlarnıñ diniy qıymetleri komitetiniñ yolbaşçısı ola. Alimler şurası da quruldı, onıñ yolbaşçısı olaraq Ukraina musulmanları birliginiñ reisi Suleyman Hayrullayev saylandı.

XS
SM
MD
LG