Qırım Muhtar Cumhuriyetiniñ prokuraturası Qırımnıñ sabıq deputatlarınıñ işlerini baqacaq mahkemelerni aydınlattı. Remzi İlyasovnıñ davası Solomenskiy rayon mahkemesinde, Vladimir Klıçnikovnıñ davası ise Dneprovskiy rayon mahkemesinde baqılacaqtır.
«Hatırlatamız, diger sabıq deputatlar Sergey Tsekov, Grigoriy İoffe, Anatoliy Zaiçenko, Sergey Şuvaynikov, Yefim Fiks ve Edim Gafarovnıñ işleri şeerniñ Desnânskiy rayon mahkemesinde baqılacaq. Konstantin Baharevniñ işi Podol rayon mahkemesinde baqılacaq. Vitaliy Nahlupin ve Svetlana Savçenkonıñ işleri 2017 senesi yanvar 10 kününe qaldırıldı», – dep bildire prokuratura.
Cinaiy işlerniñ taqiqatı devamında Qırım Muhtar Cumhuriyetiniñ prokuraturası «2014 senesi mart ayında Qırım Muhtar Cumhuriyeti Yuqarı Şurasınıñ bu deputatları Qırım işğaline yardım etkenini ve qoltutqanını isbatlağan» deliller taptı.
2016 senesi dekabr ayınıñ soñunda Qırım Muhtar Cumhuriyetiniñ prokuraturası mahkemeden aldın taqiqatnı yekünlep, Qırımnıñ sabıq deputatlarına qarşı çıqarılğan qabaat qararlarını mahkemege yolladı. Sergey Tsekov, Svetlana Savçenko, Konstantin Baharev, Edip Gafarov, Anatoliy Zaiçenko, Remzi İlyasov, Grigoriy İoffe, Vladimir Klıçnikov, Vitaliy Nahlupin, Yefim Fiks, Sergey Şuvaynikov Ukraina Ceza kodeksiniñ 111-inci maddesiniñ 1-inci qısmındaki (devlet hainligi) cinayet işlemesi ile qabaatlana.
