Link açıqlığı

Qırımda hasta balalarğa para toplama aktsiyası keçirilecektir – QAMDİ


İmamlar körüşüvi, 2017 senesi yanvar 4 künü

Qırım ve Aqyar musulmanları diniy idaresi hasta balalarğa sadaqa parasını toplaycaq qutularnı azırladı. Olarnı tükân, ticaret merkezleri, insanlar toplanğan yerler ve qırımtatarlar toplu yaşağan rayonlarda yerleştirecekler.

Aktsiyağa «Merhametlik» adı berildi, onıñ keçirilmesi yanvar 4-de Qırım müftisi acı Emirali Ablayevniñ Qırım imamları ile yapqan körüşüvinde muzakere etildi, dep haber ete QAMDİ matbuat hızmeti.

«Diqqat etiñiz ki, «Merhametlik» hayriye aktsiyasınıñ mahsus qutularında Qırım ve Aqyar musulmanları diniy idaresi ve Qırım musulmanları fondunıñ işaretleri bar», – dep aytıla haberde.

Aktsiya yekünlengen soñ toplanğan para yardım istegen hasta balalarğa berilecektir, dep qayd etti QAMDİ.

«Teselli» qırımtatar ansambli yardımğa muhtac qorantalarnıñ balaları içün hayriye kontsert yapmağa azır. Qırım.Online içtimaiy ağınıñ faalleri biletlerni satın alacaq insanlarnı qıdıra.

2016 senesi işğal etilgen Qırımda «Bizim balalar» leyhası başlatıldı. Leyha teşebbüsçisi jurnalist Lilâ Bucurova oldı. Onıñ maqsadı – Qırımnıñ siyasiy mabusları ve ğayıp olğan ya da qaçırılğan qırımtatarlarnıñ qorantalarına yardım etmektir. Leyha yalıñız maddiy yardımnı qabul etmey. Leyha çerçivesinde siyasiy taqiplerge oğrağan insanlarnıñ balalarına yardım kösterile: para, urba ve oyuncaqlar, raatlıq ve tedaviylev, psihologik yardım ve ilâhre.

XS
SM
MD
LG