Qırımdaki «Qırım» cemaat areketiniñ faalleri Rusiye akimiyeti organlarındaki vazifelerinden ayırılmağa başladı. Bunı Qırım siyasetşınası ve cemaat faali Lenur Usmanov Qırım.Aqiqatqa bildirdi.
«Köremiz ki, «Qırım» areketiniñ lideri Remzi İlyasovnıñ insanlar Qırımdaki reberiyet vazifelerinden çıqarıla. Teyfuk Gafarov Aqmescit memuriyetiniñ yolbaşçısı muavini vazifesinden istep ayırıldı, sanki, Qarasuvbazar rayonı memuriyetiniñ milletlerara munasebetler ve repatriantlarnıñ abadanlaştıruvı meselelerini baqqan Murat Yazıciyev de işten boşadı. Aluştada «Qırım» areketiniñ vekilleri vazifelerinden ayırıldı. İleride de devamı olacaq, dep tüşünem», – dep izaatladı vaziyetni Lenur Usmanov Qırım.Aqiqatqa.
Cemaat faaliniñ bildirgenine köre, Qırımnıñ Rusiye yolbaşçısı Sergey Aksenov Remzi İlyasovdan memnün degil.
«Remzi İlyasov Qırım yolbaşçısınıñ istegine qarşı çıqıp, öz namzetini Rusiye Devlet dumasına köstergen edi. Neticede yutturdı. Aksenovnıñ planlaştırğanı kibi, onıñ insanı Ruslan Balbek namzet kösterildi ve Devlet dumasınıñ deputatı oldı. Aksenov İlyasov ve onıñ insanlarından memnün degil», – dep qayd ete cemaat faali.
«Qırım» qırımtatar halqınıñ regionlarara cemaat areketi» regionlarara cemaat teşkilâtı 2015 senesi aprel 29-da quruldı. Onıñ reisi Qırımnıñ Rusiye Devlet şurasınıñ reis muavini Remzi İlyasov oldı.
