Qırımda 2016 senesiniñ neticelerine köre akimiyet organları faaliyetiniñ semereligi aqqında sorav keçirecek olalar. Bunı Kreml kontrol etken Qırım ükümetiniñ matbuat hızmeti bildirdi.
«Sorav maqsadı – yerli idare organları, regional ve belediye seviyelerinde çalışqan ünitar müessise, Qırımda belediye qurulışlarınıñ ealisine hızmet etken ve aktsiyalarnıñ ekseriyeti Qırımnıñ mal-mülkine ya da belediyege ait olğan aktsionerler cemiyetleriniñ reberleri faaliyetiniñ semereligine qıymet kesüvdir», – dep qayd etti matbuat hızmeti.
Bundan evel Aqyar sakinleri şeer ükümetindeki vazifeler yarışında faal degiller, dep bildirilgen edi.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ işğal ve ilhâq etilmesini qanunsız areket olaraq tanıdılar. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
