Türkiye parlamenti ükümetniñ keçken sene iyül ayında olıp keçken devlet avdarması teşebbüsinden soñ ilân etilgen ve endi bir kere uzatılğan fevqulâde vaziyetni daa bir kere uzatmaq teklifini qabul etti. Bunı Radio Svoboda yanvar 3-de bildire.
Yanvar 19-da yekünlenecek fevqulâde vaziye endi aprel 19-na qadar uzatıldı.
Baş nazir muavini Numan Kurtulmuşnıñ aytqanına köre, fevqulâde vaziyetniñ uzatılması memlekette yüz bergen terrorist ücümlerinen bağlı.
Soñki ve eñ deşetli teraktlardan biri yanvar 1-de gece yüz berdi. Kimligi alâ daa belli olmağan qatil İstanbulnıñ eñ populâr gece klublarından birinde 39 insannı öldürdi ve onlarnen insannı yaraladı. Bu ücüm avdarma teşebbüsinen bağlı degildir. Mesülietni «İslâm devleti» ekstremist teşkilâtı öz boynuna alğandır.
