Aqmescitteki Borçoqraq (Fontanı) qasabasında yañı mektep quruldı. Bunı Kreml kontrol etken şeer memuriyetiniñ matbuat hızmeti bildirdi.
«Müessiseniñ vazifesi – umumtasil esnasnıñ çerçivelerinden çıqmaqtır. Rusça ve qırımtatarca tasil bermeknen beraber qasabada tasil, medeniyet, gumanitar merkezini qrumaqtır. Umumtasil oqu yurtunda bala bağçasınıñ qurucılığı başladı», – dep ayttı Qırımnıñ Rusiye parlamentiniñ reisi Vladimir Konstantinov.
Kreml kontrol etken Aqmescit yolbaşçısı Viktor Ageyev «Borçoqraq qasabasında bir de bir oquv yurtu olmağanını ve balalar 38-inci, 15-inci mektepke, 11-inci gimnaziyağa qatnamağa mecbur olğanını aytıp, oquv yurtunıñ açılması mezkür mekteplerde ekinci nevbetni qapatmağa imkân berir», dep bildirdi.
Mektepke qırımtatar istihbaratçısı Alime Abdennanovanıñ adını bermege planlaştıra ekenler.
Yañı mektep 900 talebeni sığdıra ve «Rusiye Federatsiyasınıñ talaplarına uyğun» zemaneviy donatma, şu cümleden yanğın havfsızlığı ve video nezareti ile temin etilgendir.
Noyabr ortasında Borçoqraq qasabasınıñ sakinleri yarımadanıñ şimdiki akimiyetini mektepke qırımtatar statusını bermege çağırdılar.
Rusiyeniñ Qırım işğalinden soñ milliy mekteplerde bile dersler rusça ola, qırımtatar mektepleri ne ders kitapları, ne de dersliklernen temin etile. Bunı er vaqıt Qırımtatar Milliy Meclisi ve qırımtatar cemaat teşkilâtları qayd ete.
