2017 senesi Türkiye Ukraina ordusınıñ ihtiyaclarına 3,1 mln dollar ayıracaqtır. Bunı Ukrainanıñ Türkiyedeki elçisi Andrey Sibiga Twitterde yazdı.
«Acayip bir yıl soñu, añlaşma imzaladım. 2017 senesi Türkiye Ukraina ordusına 3,1 million dollar yardım olaraq berecektir. Strategik ortaqlıq çalışa», – dep bildirdi elçi.
Sibiga qayd etti ki, arbiy-sanayı saasında Türkiye ile işbirligi 2017 senesiniñ eñ müim meselelerinden biridir.
Türkiyedeki Ukraina elçihanesiniñ malümatına köre, Ukraina ve Türkiye ükümetleriniñ vekilleri işbirligi añlaşmasını dekabr 30-da Ankarada imzaladılar.
«Añlaşma 5 sene devamında yılda 3 million AQŞ dollarınıñ ayırılmasını belgilemektedir. Türkiye tarafınıñ ayırğan sermiyası Ukraina Silâlı quvetleriniñ ihtiyaclarını qarşılamaq içün türk arbiy ve çift qullanımlı malzemelerini satın almaq içün qullanacaqtır», – dep aytıla ukrain elçihanesiniñ haberinde.
Soñki vaqıtları Türkiye Rusiye ile yaqın olmağa başladı. 2015 senesi noyabr ayında türk askerleri Türkiye-Rusiye sıñırında Rusiye arbiy uçağını tüşürgen soñ eki memleket arasındaki munasebetler bayağı kerginleşken edi. Rusiye Türkiyege qarşı iqtisadiy cezalar kirsetip, Rusiye vatandaşlarınıñ Türkiyege barmasını sıñırlağan edi.
