Cumaaqşamı künü, dekabr 29-da, gece saat 2.30-da Aqmescit rayonınıñ Mamaq (Strogonovka) köyündeki Sarı Baş soqağında qırımtatarlarnıñ evi yandı. Bunı Qırımtatar Milliy Qurultayı Merkeziy saylav komissiyasınıñ reisi Zair Smedlâyev Facebookta bildirdi.
Smedlâyev yanğın yeriniñ fotoresimlerini de derc etti.
«Nariman ve Lenura Asanovlarnıñ yaş qorantası eki balaları 11 yaşında Akim ve 9 yaşında Selim ile evsiz ve parasız qaldı. Lenura ve büyük oğlu 6-ncı şeer hastahanesiniñ yanıq bölüginde yatalar. Er şey yandı, vesiqa ve cep telefonları bile qalmadı. Yardım mevzusında musulman cemiyetiniñ reisi Dittanov Dilâver ağa ile bağlanmaq mümkün, Strogonovka, Amethan Sultan soq., 5, +7978 012 4478 ya da Ruslan Lümanovnen bağlanmaq mümkün, +7978 822 4152. Dostlar, bu zor zamanlarda belâğa oğrağan insanlarnı yardımsız bıraqmayıq!», – dep yazdı Smedlâyev.
Noyabr ayında olğan malümatqa köre, 2016 senesiniñ başından başlap işğal etilgen Qırımda 871 yanğın söndürildi, 81 insan qurtarıldı.
