«Hizb ut-Tahrir davasınıñ» Yaltalı şahsı Vadim Siruk psihiatrik ekspertizadan keçken soñ SİZOğa qaytarıldı. Bunı dekabr 30-da ömür arqadaşı Anna Bogaçeva Qırım.Aqiqat saytına bildirdi.
Bogaçevanıñ aytqanına köre, psihiatrik hastahanede «ekimler hastalarğa pek diqqatlı yanaşa, amma er şeyni OMON hadimleri nezaret ete, bu sebepten bunı maneviy basqı olaraq saymaq mümkün».
«Vadim Siruknıñ sağlığına dair bir de bir malümat şimdilik yoq. Advokat onı SİZOda ziyaret etip, er şeyni ögrenecek, bekleymiz», – dep qayd etti Bogaçeva.
Yaqalanğannıñ ömür arqadaşı dekabr 30-da Vadim Sirukqa aş bermek içün SİZOğa kelgenini bildire.
«Adam pek çoq. O birisi kün sıra aldım – cedvel yoq oldı, ağam tünevin yañı cedvelge yazdırdı. İnsanlar dey ki, gece cedvel kene yırtılmasın dep, bir qaç kere kelip baqqan ediler. 60 insandan ziyade nevbette tura, aqşamğa qadar yetiştirseler yahşı. Er şeyni bermekten evel kese/paketten çıqara/teşe ve tartalar. Çoq vaqıt kete», – dep yazdı Bogaçeva Facebook saifesinde.
Oktâbr 12 künü Qırımda beş musulman ailede tintüvler keçirilgen edi. Tintüvlerden soñ beş qırımtatarı yaqalandı ve Rusiyede yasaq etilgen «Hizb ut-Tahrir» teşkilâtaında iştirak etkenlerinde qabaatlandılar: Rustem İsmailov, Uzair Abdullayev, Teymur Abdullayev, Emil Cemadenov ve Ayder Saledinov.
Yaltada çiçek satqan Vadim Siruk, «Hizb ut-Tahrir işi» boyunca qabaatlanıp, yarım yıldan ziyede apiste qala, o 2016 senesi fevral 11 künü yaqalanğan edi.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
