Qırımtatar Milliy Meclisiniñ reis muavini İlmi Ümerov Qırım mahkemesiniñ oña bergen para cezasını ödep olamadı, bank programmasında onı «ekstremist» olaraq blok etkenler. Bunı Ümerov dekabr 29-da Facebookta bildirdi.
«Noyabr 9-da Qırımnıñ sözde Yuqarı mahkemesi Bağçasaray rayon mahkemesiniñ meni memuriy cinayet işlemesi ile qabaatlamaq ve para cezasını bermek qararını tasdıqladı. Men özüm bankqa keldim, amma bu yardım etmedi. Bank hadimleri yolbaşçılarınen aqıl tanışıp ve menden afu sorap, menim adımdan er angi bank tedbirlerini keçirmek imkânsız, çünki İlmi Ümerov programmada «ekstremist» olaraq blok etildi, dep ayttılar. İşğal etilgen Qırım banklarınıñ hızmetlerinden faydalanmayım, amma bu olar bergen para cezasıdır, onı nasıl ödeycem bilmeyim. Yanvar 9-na qadar bunı yapmaq kerek», – dep yazdı Ümerov.
Sentâbr 26-da Qırımda olğan 8 Meclis azasını, şu cümleden İlmi Ümerovnı, «E» merkezine (ekstremizm ile küreş idaresi – QA) çağırıp, «yasaq etilgen toplaşuvlarda» iştirak etmeleri içün memuriy protokollar tizdiler.
Ümerov Rusiyeniñ Memuriy cinayetler kodeksiniñ 20.28 maddesiniñ 1-inci qısmı «Faaliyeti toqtatılğan cemaat ya da din teşkilâtınıñ faaliyetini teşkil etüv» ile qabaatlanjı.
Sentâbr 28-de toplaşuvda iştirak etkeni içün İlmi Ümerovğa para cezası berildi.
Sentâbr 22-de Meclis azaları Meclis azaları Emirali Ablayev, Ruslan Yakubov ve Ayder Acimambetovnıñ vekâletlerini toqtatqan toplaşuvda iştirak etti. Acimambetov Meclis reisiniñ muavini vazifesinden de ayırıldı.
Rusiyege bağlı olğan Qırım Yuqarı Mahkemesi aprel 26 künü Meclisniñ areketini toqtatmaq qararını alğan edi. Dünya toplulığı rus akimiyetiniñ böyle faaliyetine qatiyen qarşı çıqtı. Meclisniñ imayesi Rusiye Yuqarı Mahkemesine şikâyet arizasını yollağan edi.
Sentâbr 29-da Rusiye Yuqarı Mahkemesi şikâyet arizasına cevap olaraq Qırımtatar Milliy Meclisiniñ faaliyetini yasaq etti.
