«Qırımtatar Maaliy Merkezi» uquq qorçalayıcı teşkilâtı Rusiye akimiyetinden sürgün etilgen qırımlı Nedim Halilovnı azatlıqtan marum etüv noqtasından azat etip, ayat ve tibbiy yardım aqqına riayet etmege talap etti.
Bu aqqında dekabr 29-da «Qırımtatar maaliy merkeziniñ» Facebooktaki beyanatında aytıla.
Uquq qorçalayıcılar dey ki, dekabr 29-da saba Nedim Halilovnı başqa lagerge avuştırmağa başladılar – Gülkeviçi qasabasına. «Qırımtatar maaliy merkezi» bildire ki, «qırımlınıñ 600 kilometr yolğa dayanması zor».
«Qırımtatar Maaliy Merkezi» uquq qorçalayıcı teşkilâtı Rusiye akimiyetinden şunı talap ete: Nedim Halilov azatlıqtan marmu etüv yerlerinden azat etilecek, Halilovnıñ ayat, tibbiy yardım, azatlıq aqqına riayet etilecek, Rusiye akimiyeti uquqsız ve adaletsiz areketler yapıp ketirgen zararını ödeycek», – dep aytıla beyanatta.
Uquq qorçalayıcılar Birleşken Milletler Teşkilâtı ve halqara uquq qorçalayıcı qurulışlarğa muracaat etip, Rusiye tarafından Nedim Halilovğa qarşı yapılğan areketlerni qayd etmege çağıra.
Sürgün etilgen qırımtatarı Nedim Halilov bir aydan ziyade Krasnodar ülkesindeki mahsus noqtada açlıq tuta, onı hastahanege zornen yatqızmağa isteyler, dep haber etilgen edi.
Bundan evel Nedim Halilov Rusiye uquq qoruyıcı müessiselerine muracaat etip, sağlığı fenalaşqan taqdirde hastahanege yatqızmamalarını rica etti.
Noyabr 7 künü Kreml kontrolündeki mahkemeniñ qararı ile qırımtatarı Nedim Halilov Qırımdan tış çıqarıldı. Halilovqa evine kirip, sıcaq urba, para ve vesiqalarını almağa izin berdiler. Dekabr 29-da Halilov Krasnodar ülkesindeki filtratsion noqtada qala edi.
