Kreml kontrol etken Aqmescitniñ Kiyev rayon mahkemesinde yazda Qırımda yaqalanğan «diversant» Redvan Suleymanovnıñ apis cezası uzatılmasına dair oturış olıp keçti. Mahkemeci SİZOda yatma müddetini 2017 senesi yanvar 30-na qadar uzattı, bunı advokat Emil Kürbedinov Facebookta bildirdi.
«Redvan Suleymanov – bu sene FSB tarafından yaqalanğan «diversant» – mahkeme tarafından sebepsiz alda 2017 senesi yanvar 30-na qadar apiste qaldırıldı. FSB bildire ki, Suleymanov Rusiyege, şu cümleden FSB-ge 4 mln rubleden ziyade zarar ketirdi», – dep ayttı advokat.
«Ukrain diversion gruppasında» iştirak etmesi ile qabaatlanğan Redvan Suleymanov Aqmescitteki Taqiqat izolâtorında yata, onıñ davasında taqiqat devam etmekte.
Rusiye kütleviy haber vastaları FSB malümatına esaslanıp, Redvan Suleymanov iyül 30-da Aqmescit ava limanında yaqalanğanını bildirgen edi. Avgust 12-de Federal havfsızlıq hızmeti Suleymanov sorğuğa çekilgen videonı Rusiye matbuat vastalarına yolladı. Yaqalanğan dey ki, 2015 senesi oktâbr ayında Zaporojye şeerinde ukrain istihbaratı oña iş teklif etti. Suleymanovnıñ aytqanına köre, oña arbiy tehnikasınıñ areketleri aqqında malümat toplamağa emir etildi, soñra ise patlav maddeleri qoyulacaq yerlerni Aqmescit vokzalında ve ava limanında tapmağa avale etildi.
Avgust 10-da FSB bildirdi ki, avgust 7-ne keçer gecesi Qırımda yarımadada teraktlarnı azırlağan «ukrain diversantları» yaqalandı. Bundan evel Rusiye sıñırcıları üç kün devamında yarımada ile memuriy sıñırdaki kiriş ve çıqış noqtalarını blok etken edi.
Ukraina akimiyeti Moskva bergen malümatını inkâr etip, Rusiye mahsus hızmetleri «provokatsiya» yapa, dep bildire.
