Sürgün etilgen qırımlı Nedim Halilovnı dekabr 29-da saba Rostov vilâyetindeki filtratsion lagerge avuştırmağa başladılar. Bunı Halilovnıñ dostu Ayder İsmailov Qırım.Aqiqatqa bildirdi.
«Nedim Halilov saba saat 8-de maña telefon etip, onı Rostov vilâyetiniñ Gülkeviçi qasabasındaki lagerge avuştırğanlarını haber etti. Añlağanım qadar, bu tola zavodı ola. Oña azırlanması içün bir saat berildi. Soñra bağ üzüldi. Tafsilâtlı malümat almaq içün advokatnen bağlanmağa tırışamız», – dep ayttı İsmailov.
«Qırımtatar maaliy merkezi» dey ki, «o, 600 kilometr yolğa, 150 insan arasında olıp, dayanamaz, sağ qalsa da, sağlığı büyük zarar körer».
Sürgün etilgen qırımtatarı Nedim Halilov bir aydan ziyade Krasnodar ülkesindeki mahsus noqtada açlıq tuta, onı hastahanege zornen yatqızmağa isteyler, dep haber etilgen edi.
Bundan evel Nedim Halilov Rusiye uquq qoruyıcı müessiselerine muracaat etip, sağlığı fenalaşqan taqdirde hastahanege yatqızmamalarını rica etti.
Noyabr 7 künü Kreml kontrolündeki mahkemeniñ qararı ile qırımtatarı Nedim Halilov Qırımdan tış çıqarıldı. Halilovqa evine kirip, sıcaq urba, para ve vesiqalarını almağa izin berdiler. Dekabr 29-da Halilov Krasnodar ülkesindeki filtratsion noqtada qala edi.
