Link açıqlığı

Saatnıñ esas haberi

Yazda Qırımda «diversant» olaraq yaqalanğan Suleymanovnıñ apis cezası uzatıla bile


Emil Kurbedinov
Emil Kurbedinov

Kreml kontrol etken Aqmescitniñ Kiyev rayon mahkemesinde dekabr 29-da yazda Qırımda yaqalanğan «diversant» Redvan Suleymanovnıñ apiste yatma müddetini uzatmaq içün oturış keçirilmesini planlaştıralar, bunı advokat Emil Kurbedinov Facebookta bildirdi.

Onıñ qayd etkenine köre, Suleymanov – «2014 senesi Qırımdaki arbiy bölüklerinden birinde 20 kün devamında teslim olmağan qırımtatarıdır».

«Ukrain diversion gruppasında» iştirak etmesi ile qabaatlanğan Redvan Suleymanov Aqmescitteki Taqiqat izolâtorında yata, onıñ davasında taqiqat devam etmekte.

Rusiye kütleviy haber vastaları FSB malümatına esaslanıp, Redvan Suleymanov iyül 30-da Aqmescit ava limanında yaqalanğanını bildirgen edi. Avgust 12-de Federal havfsızlıq hızmeti Suleymanov sorğuğa çekilgen videonı Rusiye matbuat vastalarına yolladı. Yaqalanğan dey ki, 2015 senesi oktâbr ayında Zaporojye şeerinde ukrain istihbaratı oña iş teklif etti. Suleymanovnıñ aytqanına köre, oña arbiy tehnikasınıñ areketleri aqqında malümat toplamağa emir etildi, soñra ise patlav maddeleri qoyulacaq yerlerni Aqmescit vokzalında ve ava limanında tapmağa avale etildi.

Avgust 10-da FSB bildirdi ki, avgust 7-ne keçer gecesi Qırımda yarımadada teraktlarnı azırlağan «ukrain diversantları» yaqalandı. Bundan evel Rusiye sıñırcıları üç kün devamında yarımada ile memuriy sıñırdaki kiriş ve çıqış noqtalarını blok etken edi.

Ukraina akimiyeti Moskva bergen malümatını inkâr etip, Rusiye mahsus hızmetleri «provokatsiya» yapa, dep bildire.

XS
SM
MD
LG