Link açıqlığı

«Çiygoz davasınıñ» bu yılda soñki mahkeme oturışı Qırımda olıp keçti


Kreml kontrol etken Qırım Yuqarı mahkemesinde dekabr 28-de Qırımtatar Milliy Meclisiniñ reis muavini Ahtem Çiygoz davasınıñ bu yılda soñki mahkeme oturışı olıp keçti. Toplaaşuvda 2014 senesi fevral 26 adiseleriniñ fotoresim delilleri baqıldı. Soñki oturışnıñ ketişatını advokat Nikolay Polozov Facebookta añlattı.

«Bugün saat 14:04-ten saat 14:09-ğa qadar vaqıt, yani 5 daqqanı qaplap alğan fotoresimler tedqiq etildi. Kütleviy çatışma alâmetleri anda yoq, koridor yapmağa yardım etkenini aytqan qabaat şaatı Eyvaz Ümerov da körünmey. Ahtem Çiygoz o vaqıt Qırım Muhtar Cumhuriyetiniñ Yuqarı Şurası azbarınıñ diger qısmında olıp, fotoresimlerde körünmey», – dep bildirdi Polozov.

Ahtem Çiygoz davasınıñ nevbetteki oturışı 2017 senesi yanvar 16-da olacaqtır.

Qırım «mahkemesi» Çiygoznı aprel 8-ne qadar apiste qaldırmağa qarar alğan edi.

Ahtem Çiygoz 2015 senesi yanvar ayında 2014 senesi fevral 26-da Qırım Yuqarı Radasınıñ binası ögünde keçirilgen Ukraina topraq bütünligine qoltutuv mitinginde iştirak etkeni içün yaqalanğan edi. O vaqıt Rusiye tarafını tutqan, bu cümleden «Rus Birligi» firqası, miting iştirakçilerine qarşı çıqtı. İşğal olunğan Qırımnıñ Rusiye akimiyeti onı kütleviy çatışmalarnıñ teşkil etmesi ile qabaatlay.

Rusiye mahkemesi «Çiygoznıñ işini» «fevlral 26 işi» çerçivesinde, iyül 20-de mahkeme qapalı toplaşuvda «fevral 26 işini» ekige bölgen soñ oldı: ayrı – Ahtem Çiygoz boyunca, ve ayrı – cinaiy iş boyunca qabaatlanğan Ali Asanov ve Mustafa Degermenci boyunca.

XS
SM
MD
LG