Qırımtatar Milliy Meclisi Rusiye akimiyetiniñ Qırımdan sürgün etilgen Nedim Halilovğa qarşı yapqanlarını «cinayet» dep adlap, halqara uquq qorçalayıcılarğa muracaat etti. Muracaat metnini Meclis reisi Refat Çubarov dekabr 28-de derc etti.
«Qırımtatar Milliy Meclisi Rusiye Federatsiyası ve Qırımdaki işğalci Rusiye akimiyetiniñ qanunsız organları Nedim Halilovğa qarşı yapqan cinaiy areketlerini takbih etip, buña alâqası olğan bütün memurlarnı ceza alacaqları aqqında tenbiyeley. Halqara uquq qorçalayıcı teşkilâtlarnı acele sürette Rusiye ükümeti ile Nedim Halilovnıñ ayatı ve sağlığınıñ havfsızlığını temin etüv meselesinde bağ qurmağa çağıra», – dep aytıla beyanatta.
Sürgün etilgen qırımtatarı Nedim Halilov bir aydan ziyade Krasnodar ülkesindeki mahsus noqtada açlıq tuta, onı hastahanege zornen yatqızmağa isteyler. Rusiye uquq qorçalayıcıları Halilov 20 kilogrammğa azğanını ayttı.
Sürgün etilgen qırımlı faal Nedim Halilov bundan evel Rusiye uquq qoruyıcı müessiselerine muracaat etip, sağlığı fenalaşqan taqdirde hastahanege yatqızmamalarını rica etti.
Noyabr 7 künü Kreml kontrolündeki mahkemeniñ qararı ile qırımtatarı Nedim Halilov Qırımdan tış çıqarıldı. Halilovqa evine kirip, sıcaq urba, para ve vesiqalarını almağa imkân berdiler. Qırımtatar faali Zevid Gaziyev Facebookta yazğanı kibi, şimdi Halilov Krasnodar vilâyetinde filtreme noqtasında buluna.
